V Viflejemi novina

1.
V Viflejemi novina, Ďiva Syna zrodila,
[: porodila v blahodati neporočna Ďiva Mati Marija.:]

2.
Položila na siňi, v Viflejemskoj jaskyňi,
[: Josif Ďivu potišaje, povivati pomahaje Mariji.:]

3.
Slava Boža i chvala u vertepi nastala,
[: z neba anhely zľitajut, z Synom Božim proslavľajut Mariju.:]

4.
Sered temnoji noči, ďivne svitlo bije v oči,
[: jasna zorja zasvitila, de Ďiťatko porodila Marija.:]

5.
Nedaleko pastyrji pasli stado v doliňi,
[: do vertepa pribihajut, i z Ďiťatkom tut vitajut Mariju.:]

6.
Na koľina padajut, podarunki skladajut,
[: čto ubohyj dati može, žertvujeme Ďiťa Bože Mariji.:]

7.
Šče prichoďat tri cari, ot vostoku zvizdari,
[: dľa Isusa stavľat ščiro, ladan zoloto i miro Mariji.:]

8.
I my tože pospišme, Bohu dary prinesme
[: U pokori pribihajme, s Synom Božim vse blahajme Mariju.:]